ما تيجي ندخل الجنة سوا

كتب : شباب وبس

شباب وبنات موقعنا الحبيب... قبل ما نقول اي شئ احب اقلكم الاول
السلام عليكم ورحمة الله وبركاته
وبعد السلام نقول اهلا ومرحبا بيكم معانا من جديد
ما تيجي ندخل في الموضوع على طول ونعرف هو ايه الموضوع وازاي نشوف الطريق
بس محدش يقلي انت هاتستعمانا ولا ايه .. الطريق ده ما بيتشافش يا عم انت هاتضحك علينا ولا ايه
طيب هاقلكم وانتوا تحكموا ..
يلا بينا
الموضوع وما فيه بكل بساطة ان كلنا - ده شئ اكيد طبعا - وانا اولكم عايزين ندخل الجنة
طب ندخلها ازاي ؟؟ .. الجنة دي سلعة وكل سلعة ليها ثمن .. وثمن الجنة طاعة الله تعالى ورسوله صح ولا ايه
بس احنا عاوزين كلام واضح ومركز يا عم ... ما احنا عارفين
طب انا هاقلكم نعدي الطريق ده ازاي عشان نوصل جنته .. الحكاية بسيطة اوي
الحكاية يا شباب اننا نقول لربنا حاضر في اللي عايزه مننا يعني نقيس كل حاجة بميزان
الله بيقول .. مش انا اللي بقول
مش اجي اعمل العمل وممكن يكون يضايق ربنا واجي اضحك على نفسي واقول بس انا بحب كده واعمل العمل
انا بحب كده ايه بس .. انا كده بقول انا اللي بقول قدام ربنا .. واعمل العمل واتحدى بيه ربنا من غير ما ادرى وبالتالي هاخسر في الاخرة
طب لو والد حد منا قاله اعمل كذا هايقدر يقله لا .. ولله المثل الأعلى .. مش هايقدر ولو قدر اكيد والده هايعاقبه
يبقى الموضوع وخلاصته ... لما الواحد يجي يعمل عمل معين .. اي عمل يقيسه بالميزان اللي اتفقنا عليه ويسال نفسه كده
الله بيقول .. ولا انا اللي بقول .. ويقول لنفسه بسرعة لا طبعا الله بيقول ... وصدقوني الميزان ده بيساعد الواحد قوي انه يمشي في طريق الجنة بسهولة
ودي اول حاجة في الطريق اللي هانمشيه مع بعض للجنة ان شاء الله .. وميعادنا مع حاجة تاني في طريق الجنة فتابعونا